اوگرا کا ایل پی جی کی قیمتوں میں کمی کا اعلان: گھریلو سلنڈر 37.80 روپے سستا

آئل اینڈ گیس ریگولیٹری اتھارٹی (اوگرا) نے مئی 2025 کے لیے ایل پی جی (لیکویفائیڈ پیٹرولیم گیس) کی قیمتوں میں کمی کا اعلان کیا ہے، جس سے صارفین کو مہنگائی کے دور میں کچھ ریلیف ملے گا۔

اوگرا کی جانب سے جاری کردہ نوٹیفکیشن کے مطابق، ایل پی جی کی قیمت میں فی کلوگرام 3.20 روپے کی کمی کی گئی ہے، جس کے بعد نئی قیمت 245.16 روپے فی کلوگرام مقرر کی گئی ہے۔ اس کے علاوہ، 11.8 کلوگرام کے گھریلو سلنڈر کی قیمت میں 37.80 روپے کی کمی ہوئی ہے، جس کے بعد نئی قیمت 2,892.91 روپے ہو گئی ہے۔

اوگرا کے مطابق، یہ کمی سعودی آرامکو کے کنٹریکٹ پرائس میں 1.8 فیصد کمی اور امریکی ڈالر کے تبادلہ نرخ میں معمولی 0.22 فیصد اضافے کے باعث ہوئی ہے۔