پراجیکٹ نواز شریف کو قوم مکمل طور پر مسترد کر چکی ہے: پی ٹی آئی
’پراجیکٹ نواز شریف‘ کو قوم مکمل طور پر مسترد کر چکی ہے: پی ٹی آئی
پاکستان تحریک انصاف (پی ٹی آئی) کے ترجمان کا کہنا ہے کہ پاکستانی قوم پراجیکٹ نواز شریف کو کلی طور پر ٹھکرا چکی ہے، قوم 8 فروری کو ن لیگ کی سیاست کو بھی مسترد کرکے ہمیشہ کیلیے دفن کردے گی۔
پی ٹی آئی کے ترجمان نےپاکستان مسلم لیگ ن کے قائد نواز شریف کی گفتگو پر ردعمل دیتے ہوئے کہا کہ شریف خاندان کی لوٹ مار کے قصے کہانیاں دہائیوں سے عوام میں مشہور و معروف ہیں، خود کو مظلوم کہنے والا آج تک اپنے دفاع میں کوئی رسید پیش نہ کرسکا۔
ترجمان کا مزید کہنا تھا کہ این آر او سے خود کو سرخرو کہنے والے نواز شریف ڈیل اور مختلف کیسوں میں ضمانتوں کا مجموعہ ہیں، عدالتوں سے خصوصی معافی دلوانا بھی انہیں معصوم ثابت نہیں کرسکا۔
پی ٹی آئی کے ترجمان نے مزید بات کرتے ہوئے کہا کہ پی ٹی آئی کی معاشی کارکردگی کا اعتراف شہباز حکومت میں اقتصادی سروے میں کیا گیا جبکہ شہباز شریف کی 17 ماہ کی حکومت میں معیشت کو ایسا نقصان پہنچایا گیا جس کی تلافی ممکن نہیں۔
