نئی دہلی: بھارتی میڈیا نے دعویٰ کیا ہے کہ انٹرنیشنل کرکٹ کونسل (آئی سی سی) نے ٹی 20 ورلڈ کپ کے میچز بھارت سے کسی اور ملک منتقل کرنے کی بنگلا دیش کی درخواست مسترد کر دی ہے۔ رپورٹس کے مطابق بنگلا دیشی کرکٹ حکام نے سیکیورٹی اور لاجسٹک خدشات کے پیش نظر میچز کی منتقلی پر غور کرنے کی درخواست کی تھی۔
بھارتی میڈیا کے مطابق آئی سی سی حکام نے اس مؤقف کو مسترد کرتے ہوئے کہا کہ بھارت میں ورلڈ کپ میچز کے انعقاد کے تمام انتظامات مکمل ہیں اور سیکیورٹی سمیت دیگر معاملات پر کوئی بڑا خطرہ لاحق نہیں۔ آئی سی سی کا ماننا ہے کہ موجودہ شیڈول میں کسی قسم کی تبدیلی عالمی ایونٹ کے تسلسل کو متاثر کر سکتی ہے۔
دوسری جانب بنگلا دیشی میڈیا میں اس فیصلے پر مایوسی کا اظہار کیا جا رہا ہے، جبکہ بعض مبصرین کا کہنا ہے کہ کرکٹ سے ہٹ کر خطے کی سیاسی صورتحال بھی اس معاملے پر اثر انداز ہو سکتی ہے۔ تاہم آئی سی سی یا بنگلا دیش کرکٹ بورڈ کی جانب سے تاحال باضابطہ بیان سامنے نہیں آیا۔
