بوہری برادری نے سب کو حیران کر دیا، آج عید الاضحیٰ منانے کا اعلان
بوہری برادری نے سب کو حیران کر دیا، آج عید الاضحیٰ منانے کا اعلان
بوہری برادری نے ہمیشہ کی طرح اس سال بھی عمومی اسلامی تقویم سے ہٹ کر اپنا الگ مذہبی کیلنڈر اپنایا اور پاکستان سمیت دنیا کے مختلف حصوں میں آج 5 جون 2025 کو عید الاضحیٰ منائی جا رہی ہے۔ کراچی، حیدرآباد، لاہور، راولپنڈی، اور کوئٹہ میں بوہری مساجد میں صبح کے وقت عید کی نماز ادا کی گئی، جس میں بڑی تعداد میں مرد و خواتین نے شرکت کی۔
بوہری برادری اسماعیلی فرقے کی ایک معتدل اور منظم شاخ ہے جس کا مرکز ممبئی، بھارت میں واقع ہے، جہاں سے ان کا روحانی رہنما سیدنا مفضل سیف الدین سال بھر کے مذہبی فیصلے کرتا ہے۔ انہی کے اعلان پر دنیا بھر کی بوہری برادری روزے، عیدین اور دیگر مذہبی امور طے کرتی ہے۔
آج بوہری علاقوں میں گلیوں کو خوبصورتی سے سجایا گیا، صاف ستھری سڑکیں، خوشبوؤں سے معطر مساجد اور روایتی سفید لباس میں ملبوس افراد کی موجودگی نے عید کا منظر مکمل کر دیا۔ قربانی کا عمل بھی منظم انداز میں جاری ہے، جس میں گوشت کی تقسیم کے لیے خصوصی والنٹیئر ٹیمیں کام کر رہی ہیں۔
سوشل میڈیا پر صارفین کی جانب سے بوہری برادری کو عید کی مبارکباد پیش کی گئی جبکہ بعض افراد نے مختلف تاریخوں پر عید منانے پر سوال بھی اٹھایا۔ تاہم بوہری افراد کا مؤقف ہے کہ ان کا طریقہ فلکیاتی حسابات پر مبنی ہے اور وہ ہر سال اسی طریقے سے اپنے مذہبی تہوار مناتے ہیں۔
اس موقع پر بوہری برادری نے ملکی سلامتی، امن و امان اور فلسطین و کشمیر کے مظلوم مسلمانوں کے لیے خصوصی دعائیں بھی کیں۔
