محکمہ موسمیات کی 12 مئی تک ملک بھر میں آندھی، گرج چمک اور ژالہ باری کی پیشگوئی

محکمہ موسمیات پاکستان (PMD) نے 7 مئی سے 12 مئی 2025 تک ملک کے مختلف علاقوں میں آندھی، گرج چمک، موسلادھار بارش اور ژالہ باری کی پیشگوئی کی ہے۔ یہ موسمی نظام مغربی ہواؤں کے زیر اثر ہے جو ملک کے بالائی اور وسطی علاقوں میں داخل ہو چکا ہے۔

متاثرہ علاقے اور متوقع موسم:

پنجاب: اسلام آباد، راولپنڈی، لاہور، گوجرانوالہ، سیالکوٹ، فیصل آباد، ملتان، بہاولپور، ڈیرہ غازی خان اور دیگر اضلاع میں آندھی اور گرج چمک کے ساتھ بارش کا امکان ہے۔

خیبرپختونخوا: چترال، سوات، ایبٹ آباد، پشاور، مردان، بنوں، ڈی آئی خان سمیت دیگر اضلاع میں 7 سے 12 مئی تک شدید موسمی صورتحال متوقع ہے۔

بلوچستان: کوئٹہ، ژوب، خضدار، قلات، لسبیلہ، پنجگور اور دیگر علاقوں میں 7 مئی کی شام سے 10 مئی کے دوران جھکڑ اور گرج چمک کے ساتھ بارش کا امکان ہے۔

سندھ: سکھر، لاڑکانہ، میرپور خاص، خیرپور، جیکب آباد، کشمور، تھرپارکر، سانگھڑ، عمرکوٹ اور مٹھی میں 8 مئی کی شام سے 10 مئی کے دوران آندھی اور گرج چمک کے ساتھ بارش کا امکان ہے۔

آزاد کشمیر اور گلگت بلتستان: نیلم ویلی، مظفرآباد، راولاکوٹ، اسکردو، گلگت، ہنزہ اور دیگر علاقوں میں 8 سے 12 مئی کے دوران وقفے وقفے سے آندھی اور گرج چمک کے ساتھ بارش کی پیشگوئی کی گئی ہے۔

احتیاطی تدابیر:

محکمہ موسمیات نے شہریوں کو ہدایت کی ہے کہ وہ غیر ضروری سفر سے گریز کریں اور موسمی اپڈیٹس پر نظر رکھیں۔ کاشتکاروں کو بھی مشورہ دیا گیا ہے کہ وہ اپنی فصلوں کو ممکنہ نقصان سے بچانے کے لیے حفاظتی اقدامات کریں۔