خطیب جمعہ کے خطبوں میں جذبۂ جہاد کو فروغ دیا جائے: مفتی تقی عثمانی کا اہم پیغام

معروف اسلامی اسکالر مفتی تقی عثمانی نے جمعہ کے خطیبوں کو ہدایت کی ہے کہ وہ اپنے خطبوں میں جذبۂ جہاد، قومی حمیت اور دینی غیرت کو اجاگر کریں۔ ان کا کہنا تھا کہ حالات کا تقاضا ہے کہ امت مسلمہ کو ان کے اصل فرض منصبی کی طرف واپس لایا جائے، اور اس کے لیے منبر و محراب کو مؤثر ذریعہ بنایا جائے۔

مفتی تقی عثمانی نے کہا کہ خطبہ جمعہ صرف عبادات یا اخلاقی موضوعات تک محدود نہ رہے، بلکہ موجودہ حالات، مسلمانوں کے خلاف جاری سازشوں، اور دفاعی شعور کے فروغ پر بھی توجہ دی جائے۔ ان کے مطابق، یہ وقت جہاد کی مختلف صورتوں کو اجاگر کرنے، نوجوان نسل میں بیداری پیدا کرنے، اور دین کی سربلندی کے لیے عملی اقدامات کی ترغیب دینے کا ہے۔

ان کا یہ بیان ایسے وقت سامنے آیا ہے جب خطبۂ جمعہ کو اصلاحِ معاشرہ اور اجتماعی شعور بیدار کرنے کا ذریعہ بنایا جا رہا ہے، اور مذہبی طبقہ اس کے مؤثر استعمال پر زور دے رہا ہے۔