اب بجلی خریدیں اپنی مرضی سے! حکومت نے نیا نظام لاگو کر دیا
اب بجلی خریدیں اپنی مرضی سے! حکومت نے نیا نظام لاگو کر دیا
اسلام آباد – پاکستان میں بجلی کی خریدوفروخت کے لیے آزاد مارکیٹ کا نیا نظام لاگو کر دیا گیا ہے، جس کے تحت صارفین اب مختلف سپلائرز سے براہ راست بجلی خرید سکیں گے۔ نیشنل الیکٹرک پاور ریگولیٹری اتھارٹی (نیپرا) نے انڈیپنڈنٹ سسٹم اینڈ مارکیٹ آپریٹر (ISMO) کو لائسنس جاری کر دیا ہے، جو اب سینٹرل پاور پرچیزنگ ایجنسی (CPPA) کی جگہ لے گا۔
نئے نظام کے تحت، حکومت بجلی کی واحد خریدار نہیں رہے گی، بلکہ مارکیٹ میں مسابقت کو فروغ دیا جائے گا، جس سے بجلی کی قیمتوں میں شفافیت اور ممکنہ کمی متوقع ہے۔
ابتدائی طور پر، ISMO تین ڈائریکٹرز پر مشتمل ہوگا، جن میں ایڈیشنل سیکریٹری پاور ڈویژن سید زکریا علی شاہ (سی ای او)، سیکریٹری پاور محمد فخر عالم، اور جوائنٹ سیکریٹری خزانہ سجاد حیدر شامل ہیں۔ بعد میں ڈائریکٹرز کی تعداد 11 سے زیادہ کی جائے گی۔
وفاقی کابینہ نے نیشنل ٹرانسمیشن اینڈ ڈسپیچ کمپنی (NTDC) کو تین اداروں میں تقسیم کرنے کی منظوری دی تھی، جن میں سے ایک ISMO ہے۔
یہ اقدام پاکستان کے توانائی کے شعبے میں اصلاحات کی جانب ایک اہم قدم ہے، جس کا مقصد صارفین کو بہتر خدمات فراہم کرنا اور بجلی کی فراہمی میں بہتری لانا ہے۔
